Мамытов: капитализм — бул трамплин, дүйнө акыры социализмге ыктайт
© Sputnik / Асылбек Бактыбеков
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси Улукман Мамытов экономикалык жактан алганда дүйнөнүн келечеги социалисттик башкарууда деп эсептейт.
Капитализм менен социализмди экономикалык жактан салыштырууда философия илимин эске алуу зарыл. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, дүйнөлүк экономика жүрүп отуруп социализмге ыктайт.
"Адам коомунун пайда болушунан тартып эле адилеттүүлүккө умтулган, теңсиздик менен күрөшүү саясатын тутунган жашоо жүрүп келет. Ал тургай тамырынан ала турган болсок да, бардык эле диндердин максаты ушул, адилеттүү коом түзүү. Бул экономикалык жактан алып караганда социализм деп аталат. Демек, адам жаратылышынан эле социализмге умтулуп жашайт. Мында күч мамлекетте, жалпы журтка бирдей жашоо деген принцип бар. Ал эми капитализм андан айырмаланып күчтүүлөр гана жашап кете алган коом түзгөнгө далалаттанат. Ошондуктан биз адам табиятына бул экинчи көрүнүш жакпай турганын эске алуу менен канчалык капитализм өкүм сүрбөсүн, адам коомчулугу жүрүп отуруп социалисттик экономикалык башкаруу орноторун божомолдосок болот. Бирок ар мамлекет үчүн ар башка түшүнүк болушу ыктымал. Ар бир өлкө өзүнүн улуттук кызыкчылыгына тууралап, социализмди ылайыкташтырып алат. Либералдык социализм, демократиялык социализм, айтор, бардык эле мамлекеттер өз экономикасынын шартына ылайыктуу багытын тандап алат", — деди Мамытов.
Ал ошондуктан Кыргызстан базар экономикасы менен капиталисттик өлкө болот деген көз караштан оолактап, капитализмди басып өтүүчү бир тепкич катары гана көрүү зарылдыгын кошумчалады.
