Боромбаев: "Учур" театрына "Чатыр-Көл" кинотеатрынын ордуна имарат салынат
Жазылуу
"Учур" мамлекеттик жаштар театрына жаңы заманбап имарат салынарын театрдын директору Рыскул Боромбаев билдирди.
2001-жылы түптөлгөн "Учур" мамлекеттик жаштар театрына абалы өтө начар мурунку "Чатыр-Көл" кинотеатрынын имараты берилген. Ошондон бери оңдоодон өткөн эмес. Бул тууралуу Рыскул Боромбаев Sputnik Кыргызстан радиосунун эфиринде маек куруп жатып билдирди.
Боромбаев: "Учур" театрына "Чатыр-Көл" кинотеатрынын ордуна имарат салынат
Анын айтымында, учурда аталган театрдын артисттери УТРКнын алдындагы шарты жок чакан залда репетиция кылышууда.
"Учур" театры түптөлгөндө берилген "Чатыр-Көл" кинотеатрынын имараты ушул кезге чейин оңдоодон өткөн эмес. Алтынбек Максутов мамлекет башчысы менен жолугушканда аталган имаратты оңдоп-түзөөдөн өткөрүү тууралуу сөз болуптур. Ошондон улам министрдин суранычы менен театрга кайра жаңы имарат тургузуу максатында жетекчиликке келип калдым. Эч кандай шарты жок болсо да "Учур" театрынын артисттери ар кайсы театрда өздөрүнүн чыгармачылыгын тартуулап, спектакль коюп жүрүүгө мажбур. Ушундай шартта иштеп жатышат. Ошого карабай театрдын жамааты ишине тыкан, айтылган пикирлерди угуп-көрүп жатам. Чет мамлекеттерде өткөн бир катар фестивалдарга катышып алдыңкы орунду алып жүрүшкөнү маалым. Азыр заманбап, трансформер стилиндеги үч кабаттуу, заман талабына ылайыктуу имараттын долбоорун даярдадык. Быйыл президенттин тапшырмасы менен беш маданий объектини жаңыртуу планы бар. Аларга Опера жана балет театры, Улуттук консерватория, Бүбүсара Бейшеналиева атындагы искусство университети, "Учур" театрынын имараты жана Улуттук киностудиянын фильм тартуучу атайын павильону кирген", — деди Боромбаев.
Ал "Учур" театры ушуга чейин айлыктын аздыгы, имаратынын жоктугуна карабай ынтымактуу, жемиштүү иштеп келе жатканын кошумчалады.