Култаева: коомдо массалык маданият төмөн болсо өнүгүүгө кедергисин тийгизет
© Sputnik / Кенжебай Сатканалиев
Жазылуу
Адабий сынчы, филология илимдеринин доктору, профессор Үмүт Култаева жазуучу, акындарды өстүрүп чыгара турган адабий курс ачылганын айтты.
Адабий курс ачууну көптөн бери пландап жүргөм. Быйыл кыргыз жазма адабиятына 100 жыл толду. Мунун алкагында адабий курс ачуу боюнча президентке кат жолдодук. Бул тууралуу Үмүт Култаева Sputnik Кыргызстан радиосуна маек куруп жатып билдирди.
Култаева: коомдо массалык маданият төмөн болсо өнүгүүгө кедергисин тийгизет
Анын айтымында, аталган адабий курстун окуу мөөнөтү эки жыл.
"Бүбүсара Бейшеналиева атындагы Кыргыз мамлекеттик маданият жана искусство университетинде ачылып жаткан эки жылдык адабий курс түзүү ниети менде көптөн бери жашап келген. Быйыл жазма адабиятыбыздын 100 жылдыгына карата бул идеямды кагазга түшүрүп президентке жолдосом, өлкө башчы эки күндүн ичинде карап чыгып, аппаратына тапшырма бериптир. Ошентип Москвадагы Горький атындагы адабий институттун моделиндеги эки жылдык курс ачылып отурат. Анда Абдыганы Эркебаев, Сулайман Кайыпов сыяктуу учурдагы кыргыз адабиятынын могикандары сабак берет. Жалпы курамдын 80 пайызын профессор, академиктер түзөт. Биз азырынча төрт секцияда: проза, поэзия, драматургия жана адабий сын боюнча окутабыз деп турабыз. Жазып жүргөн, адабий идиреги бар адамдар курска тапшырса келечегине жакшы болот. Учурда коомдун маданиятын көтөрүү зарылдыгы жаралып отурат. Массалык маданият төмөн болсо ошол коомдун өнүгүүсүнө да кедергисин тийгизет эмеспи. Андыктан биздин адабий курстун аткарчу иши, жоопкерчилиги чоң", — деди Култаева.
Профессор адабий курска кабыл алуу быйылтан баштап жүрөрүн кошумчалады.
