Эксперт: балалуу болууда атанын жоопкерчилиги эненикинен чоң
© Sputnik / Асел Акмат
Жазылуу
Филология илимдеринин кандидаты, үй-бүлөлүк мамилелер боюнча эксперт Нуркыз Кадырбекова балалуу болууну пландап жана аны тарбиялоодогу атанын ордун айтты.
Баланы татыктуу тарбиялап коомго кошууда аталардын жоопкерчилиги эненикинен чоң. Ал болочоктогу урпагынын энесин тандоодон башталат. Мындай пикирин Нуркыз Кадырбекова Sputnik Кыргызстан радиосуна маек куруп жатып билдирди.
Эксперт: балалуу болууда атанын жоопкерчилиги эненикинен чоң
Анын айтымында, аталар ымыркай жарык дүйнөгө келгенден кийин эмес, түйүлдүк кезинде аны эркелетип, сүйлөшүп, байланыш түзүүнү башташы зарыл.
"Урпагынын сапаттуу уланышына биринчи кезекте эркектер жооптуу. Алар келечектеги балдарынын энесин туура тандап, андан соң алгач эле өздөрүнүн ден соолугуна кам көрүүсү зарыл. Үйлөндүм деп эле балалуу болуп албай тиешелүү дарыгерлерден текшерилип, керектүү витаминдерди ичип, ата да эне сыяктуу эле өзүн даярдашы шарт. Андан соң аял кош бойлуу кезде анын гормондордун өзгөрүүсүнө байланыштуу жаралган эмоционалдык каалоолорун аткарып, тактап айтканда, жубайына жумшак сүйлөп, эркелетип, коргоочусу бар экенин сездирип турушу керек. Бул кош бойлуу аял үчүн абдан маанилүү. Түйүлдүк менен атанын сүйлөшкөнү, аны эркелеткени болочокто төрөлүүчү баласына оң таасир тийгизерин азыр илим далилдеп жатат. Муну ата-бабаларыбыз илгери эле аныктап койгон. Ошону менен катар эле бала төрөлгөн биринчи күндөн тарта анын жынысына карабай, кыз же эркек деп бөлбөй ата колго алып көтөрүп, китеп окуп берип, сүйлөшүп туруусу зарыл. Бала түшүнбөйт, азыр эрте деген түшүнүктөр жаңылыштык. Мунун баары келечекте дене бою гана чың эмес, акылы тунук, зирек, билимге умтулган бала болуп өсүп чыгышын шарттайт", — деди Кадырбекова.
Ал көпчүлүк учурда эркектердин куру намыска алдыруусу бала тарбиясындагы эң маанилүү учурларды өткөрүп жиберишине алып келерин кошумчалады.
