Бишкектеги белгилүү 6 тойкананын ээси кармалды. Видео
15:07 28.08.2023 (Жаңыртылды: 15:21 28.08.2023)
© Фото / пресс-служба ГКНБ КР
Жазылуу
Шектүү 25-август күнү Октябрь райондук соту тарабынан УКМКнын тергөө абагына киргизилди.
БИШКЕК, 28-авг. — Sputnik. Төмөнкү Ала-Арча айыл аймагынын мурдагы башчысы Ш.Н.Ш. кызмат абалынан кыянаттык менен пайдаланууга жана кылмыштуу кирешелерди адалдоого шектелип жатат. Бул тууралуу УКМК билдирди.
Ага карата Кылмыш-жаза кодексинин 337-беренеси ("Кызматтык абалын кыянаттык менен пайдалануу") жана 222-беренесинде ("Кылмыштуу акчаны адалдоо") каралган кылмыш белгилери боюнча иш козголгон.
"Төмөнкү Ала-Арча айыл өкмөтүнүн башчысы кызматын аркалап турганда кызматтык абалынан кыянаттык менен пайда алуу максатында, кызматтын кызыкчылыгына каршы, кылмыш дүйнөсүнүн өкүлдөрү менен тыгыз байланышта болуу, кызыкдар тараптардын кызыкчылыктарын лоббирлөө, башка компаниялардын өкүлдөрүнө кысым көрсөтүү жана коркутуу жолу менен мамлекеттик сатып алууларга катышып, аффилирленген компанияларга жеңиштерди ыйгарган. Муну менен бирге Ш.Н.Ш. кылмыштуу кирешелерди легалдаштыруу (адалдоо) максатында айыл өкмөтүн башкарып турганда башка фигуранттарга каттоо менен бир катар кыймылдуу жана кыймылсыз мүлктөрдү мыйзамсыз алган", — деп айтылат маалыматта.
УКМК төмөнкү мүлктү санап берди:
20 жер участогу;
29 автоунаа;
6 турак үй;
31 батир;
5 өндүрүш цехи;
бетон заводу;
соода борбору;
спорттук комплекс;
кум жана шагыл композицияларын чыгаруучу карьер;
техникалык тейлөө станциялары;
3 унаа токтотуучу жай;
3 сарай;
6 ресторан.
"Аталган мүлктүн басымдуу бөлүгү Чүй облусунун Аламүдүн районунун аймагында жайгашкан", — деди УКМК.
Ш.Н.Ш. 25-август күнү Октябрь райондук соту тарабынан УКМКнын тергөө абагына киргизилди.
Учурда шектүү жана коррупцияга тиешеси бар адамдар тарабынан жасалган башка мыйзамсыз фактыларды аныктоого багытталган ыкчам тергөө иш-чаралары улантылууда.
