Россияга сүт экспорттоо эмне үчүн токтоду? Өкмөттүн жана депутаттын пикири
13:46 24.04.2023 (Жаңыртылды: 14:36 24.04.2023)
© Sputnik / Алексей Мальгавко
/ Жазылуу
Кыргызстан сүт азыктарын үч өлкөгө экспорттойт, анын 19 пайызы Россияга таандык.
БИШКЕК, 24-апр. — Sputnik. Кыргызстандык ишканалар Россияга сүт азыктарын мурда белгиленген көлөмдөн ашыкча экспорттоп жибергени үчүн убактылуу тыюу салынды. Бул тууралуу экономика жана коммерция министринин орун басары Назарбек Малаев парламенттин тармактык комитетинде билдирди.
"Россия тарап келип инспекция жүргүзүп кеткен. Сүттүн экспорту аябай өсүп кеткендиктен өзүңөр чыгарып жатасыңарбы же башка жактан ташып келип атасыңарбы деген себеп менен азыр иликтөө жүргүзүлүп жатат. Алар биздин Ветеринардык кызматка "сертификат бербей тургула, биргеликте иликтеп бүтөлү" деп кайрылышты", — деди Малаев.
Ал эми айыл чарба министринин орун басары Нурдин Алишеров министрдин дагы бир орун басары Москва шаарында бүгүн Россельхознадзордун башчысы менен жолугарын айтты. Анын жыйынтыгы боюнча да маалымат берилет.
Алишеровдун билдиргенине таянсак, Кыргызстан сүт азыктарын үч өлкөгө экспорттойт. Анын 73 пайызы Казакстанга, 19 пайызы Россияга кетет. Учурда аталган продукцияны Өзбекстанга сата турган ишканалардын санын көбөйтүү боюнча иштер жүрүп жатат.
Өз кезегинде депутат Балбак Түлөбаев кыргызстандык ишканаларга тыкыр көзөмөл жасалбагандыктан ушундай маселе жаралды деп эсептейт.
"Балээнин баары биздин бардык нерсеге көз жумуп койгонубузда. Мисалы, Россияга сүт сатабыз деп беш завод уруксат алган, көлөмү да маалымдалган. Бир завод 15 миң литр чыгарууга жөндөмдүү болушу мүмкүн. Анан эле күпүлдөтүп Россияга 30-40 миң тонна чыгара баштаса, алар да "муну кайдан алдыңар?" деп айтат да. Бир лицензиясы бар ишкана Чүйдөн, Көлдөн чогултуп келип эле сатып жатат. Балык боюнча дагы ушундай болгон. Эми келесоо эмес да. "Кытайдан алып келдиңерби же порошокпу" деп шектенет. Урматтуу кыргызстандыктар, биз өзүбүздү-өзүбүз алдашыбыз мүмкүн, бирок башка өлкөлөрдү албай албайбыз. Баарын ирети менен кылсак, сүт, балыгыбызды жөн эле коё берет", — деди Түлөбаев.
Ошондой эле ал азыркыдай кырдаал жаралбашы үчүн ачык-айкындуулукту камсыздаган өкмөттүн ККМ, эсеп-фактурасы сыяктуу аракеттерин четке какпоо керектигин кошумчалады.
Белгилей кетсек, Россия 21-апрелден тартып Кыргызстандан сүт азыктарын алууну токтоткон. Россельхознадзор ага бир нече эреже бузуулар себеп болгонун айтууда.
19 Чын Куран 2023, 11:08
