Нурбаев: аймактарда дүйнөлүк деңгээлде ой жүгүрткөн мугалимдер бар
© Sputnik / Асел Акмат
Жазылуу
"Билимдүү Кыргызстан" улуттук демилгесинин жетекчиси Абдывахап Нурбаев билим берүү тармагына жаңы стандарттарды киргизүү маалы келип жеткенин айтты.
"Билимдүү Кыргызстан" улуттук демилгеси — билим берүү жаатына тиешелүү ой-сунуштарды эркин айтчу аянтча. Бул тууралуу Абдывахап Нурбаев Sputnik Кыргызстан радиосунун эфиринде маек куруп жатып билдирди.
Нурбаев: аймактарда дүйнөлүк деңгээлде ой жүгүрткөн мугалимдер бар
Анын айтымында, аталган демилгенин алдыда эки чоң планы бар.
"Биринчиси — 2022-жылдын январь айында түзүлгөн эксперттик топ билим берүү жаатында жаңы стандарттарды киргизүү боюнча даярдагын мыйзам долбоорун күчүнө киргизүү. Экинчиси — мыйзам долбоору өткөндөн кийин анда жазылган пландарды ишке ашыруу. Биз сунуштап жаткан мыйзам долбоорунда азыркы замандын талабы болгон команда менен иштөө, IT тармагында окутуу жана баланы кичинесинен баштап ишкерликке үйрөтүү каралган. Эксперттердин айтканына таянсак, биздин балдар Европадагы балдарга салыштырмалуу ошондой эле убакыт, ошончо эле энергия кетирип, бирок беш эсе аз акча табышат экен. Мындай көрүнүш экономикага да аз салым кошот дегенди билдирет. Ошол үчүн мектепте окуп жаткан окуучуларга да экономикалык сабаттуулук боюнча сабактарды өтүү зарыл. Дүйнө күн сайын өзгөрүп жатат. Биз да артта калбаганга аракет кылышыбыз керек. Жер-жерлерди кыдырганда аймактардан дүйнөлүк деңгээлде ой жүгүрткөн мугалимдерди учурата алдым. Айрымдар тартынып же коркуп, оюн ачык айта албайт. Бирок сонун идеялары бар болот. “Билимдүү Кыргызстан” улуттук демилгеси — билим берүү тармагына байланыштуу ой-сунуштарды эркин, көз карандысыз айтууга эң мыкты аянтча", — деди Нурбаев.
Ал окуучуларга замандын талабына жараша билим берүү менен улуттук тарбияны да кошо берүү керектигин кошумчалады.
