Каримов: көрнөк-жарнактарды иретке келтирген дизайн-код иштелип чыкты
© Sputnik / Асель Сыдыкова
Жазылуу
"Бишкек башкы архитектура" мамлекеттик мекемесинин шаардын тышкы жарнак жана жасалгалоо бөлүмүнүн башчысы Алмаз Каримов эки айдан бери борбордогу көрнөк-жарнактарды иретке келтирүү иштери жигердүү жүрүп жатканын айтты.
Бишкектин сырткы көрүнүшүн иреттөө максатында илинген көрнөк-жарнактарды жайгаштыруу боюнча дизайн-код иштелип чыкты. Бул тууралуу Алмаз Каримов Sputnik Кыргызстан радиосунун эфиринде маек куруп жатып билдирди.
Каримов: көрнөк-жарнактарды иретке келтирген дизайн-код иштелип чыкты
Анын айтымында, Бишкектин бардык тышкы жарнактары учурда бирдиктүү эстетикалык көрүнүшкө алып келинүүдө.
"Бишкек башкы архитектура" мамлекеттик мекемеси көрнөк-жарнактарды иретке келтирүүдө Мамлекеттик тил комиссиясы менен тыгыз иштешет. Бүгүнкү күндө Бишкекте шаардын бирдиктүү дизайн-коду — тышкы көрнөк-жарнактар жөнүндөгү документ иштелип чыкты. Учурда Бишкек шаардык кеӊешинин бекитип берүүсүн күтүп жатабыз. Республикада көрнөк-жарнактарды иретке келтирүү көйгөйү көптөн бери бар. Коӊшу мамлекеттер бул маселени толугу менен чечип алышты. Азыр мэриянын буйругу менен Бишкек шаарында мыйзамсыз жана талапка жооп бербеген жарнамалык-маалыматтык түзүмдөр демонтаждалууда. Тышкы жарнама боюнча сунуштар жана талаптарга ылайык, бир уюмга бир маалымат белгисин коюуга уруксат берилет. Ал биринчи жана экинчи кабаттардын ортосундагы парапет бөлүгүн бойлой кире бериштин үстүндө жайгашууга тийиш. Ал эми алмашуу пунктуна бир валюта тактасына уруксат берилет. Башка кашаа, көчмө мамылар, чоң жана орто өлчөмдөгү баннерлер жана лайтбокстор өӊдүү конструкцияларды коюуга тыюу салынат. Маалымат белгисин мыйзамдаштыруу үчүн "Бишкек башкы архитектура" мекемесинин "Бирдиктүү терезе" бөлүмүнө кайрылып, жайдын техникалык паспортунун көчүрмөсүн, ээсинин паспорт көчүрмөсүн, имараттын долбоорунун маалымат структурасын тапшыруу керек. Ижарачылар жайдын ээси менен ижара келишиминин көчүрмөсүн, менчик ээсинен ишеним каттын көчүрмөсүн жана паспорттун көчүрмөсүн тиркөөсү керек. Маалымат белгиси жайгаша турган жердин сүрөтүн да кошсо болот", — деди Каримов.
Ал учурда "Бишкек башкы архитектура" мамлекеттик мекемесинин талапты аткарбаган ишкерлерге айып пул салуу укугу жок экенин кошумчалады.
