Мүсүралиев: адам 6 айлык чыгымын жаба турган акча топтоп алганы оң
© Фото / пресс-служба НБКР
Жазылуу
Улуттук банктын коомчулук менен иш алып баруу бөлүмүнүн финансылык сабаттуулук секторунун жетекчиси Кубаныч Мүсүралиев каражат чогултууга байланыштуу айрым маселелер боюнча кеңеш берди.
Ар бир адам жашоосунда кандайдыр бир өзгөрүүлөргө кабылышы мүмкүн. Ушундай учурда биринчи эле финансы маселеси жаралат. Андыктан жай турмушунда алты айлык чыгымдарын жаба ала турган акчаны чогултуп алганы жакшы. Мындай пикирин Кубаныч Мүсүралиев Sputnik Кыргызстан радиосуна маек куруп жатып билдирди.
Мүсүралиев: адам 6 айлык чыгымын жаба турган акча топтоп алганы оң
Анын айтымында, каражатты үйдө колго кармап эмес, банк, сактык аманат кассаларында чогулткан пайдалуураак.
"Күнүмдүк жашоосунда ар бир адам чыгымын көзөмөлдөп, кирешесинин бир бөлүгүн депозитке которушу керек. Мындай кадамдарды эреже катары өз жашоосуна киргизип алганы дурус. Жумуштан кыскарып, жер которуп же ооруп калган учурда ошол чогулткан каражат жардамга келет. Жашоодо кандайдыр бир терс өзгөрүүлөргө дуушар болбогон учурда деле адамдын инсан катары өсүшү да ушул каражатка байланыштуу. Эгер акчаң болсо билимиңди тереңдетип кандайдыр бир курстарды окуп же кесибиңди алмаштырган учурда билим алыш керек болсо чогулткан акчаң сага кызмат кылат. Болбосо жөн гана ошол акчага саякаттап эс алсаң болот. Инвестиция кылып кыймылсыз мүлк алып же балким ишкерликти баштайсың. Айтор, каражатты чогултуу менен жашоодо жаңы кадамдарды коркпой ишке ашырууга жакшы шарт түзүлөт. Бирок аны кантип топтоо керек? Көптөр банкка салгандан чочулашат. Ошентсе да адистер үйдө эмес, аманат кассаларында чогултууга кеңеш берет. Бул жерде акчаңыздын сакталышына кепилдик бар жана пайыз кошулуп турат. Каражатыңыз көбүрөөк болсо аны эки-үч банкта кармаңыз. Топтоого белсенгенде алгач киреше менен чыгымдарды жазып чыгып, аларды көзөмөлдөп жана тапкан акчанын 10 пайызынан баштап чогултуу керек. Акырындык менен 20, андан соң 30 пайызга чейин көтөрсө болот. Ошол эле учурда адам өзүнүн финансылык жүрүм-турумун дыкат көзөмөлдөп турушу абзел", — деди Мүсүралиев.
Адис айлык алганда коротпой туруп дароо депозитке которуу акча чогултуунун маанилүү кадамдарынын бири экенин кошумчалады.
