Темиркул Үмөталиев, Гапар Айтиев, Түгөлбай Сыдыкбеков. Таберик сүрөт

Жазылуу
Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, тарыхын баяндайт.
© Sputnik / Александр Федоров
Кыргыз эл акыны Темиркул Үмөталиев, СССРдин эл сүрөтчүсү Гапар Айтиев жана Кыргыз Эл Баатыры, залкар жазуучу Түгөлбай Сыдыкбековдун сүрөтү 1974-жылы Фрунзе (азыркы Бишкек) шаарында тартылган.
Залкарларды Түгөлбай Сыдыкбековдун уулу Сабырбек Сыдыкбеков мындайча эскерет:
"Мен мектепте окуп жүргөн кезде сүрөттөгү инсандар биз үчүн чоң аксакалдар болчу. Атам менен Темиркул Үмөталиев көп шахмат ойноп калды. Мен болсо акындын уулу Таалайбек менен ойноп жөнөчүмүн. Гапар Айтиевдин уулу Сатар Айтиев менден эки жаш улуу эле. Сүрөтчү биздикине мейман болуп келчү. Айтиевдин атама белек кылган сүрөттөрү азыркыга чейин сакталып турат. Айтиевдер менен борбор калаадагы азыркы Раззаков көчөсүндө турчубуз. Негизи үчөөнүн мамилеси жакшы болгон. Дос, замандаш катары катышчу. Ал кезде Эркиндик бульвары тынч, азыркыдай эл көп жүрчү эмес. Жалаң чоңдор, элге төбөсү көрүнгөн инсандарды кезиктирчүбүз. Ошол жылдары интеллигенция өкүлдөрүнө мамиле аябай жакшы эле. Биздин үйгө белгилүү хирург Иса Ахунбаев, мамлекеттик ишмер Абды Сүйөркулов, манасчы Саякбай Каралаев, жазуучулардан Чыңгыз Айтматов, Бексултан Жакиев, режиссёрлордон Болот Шамшиев, Төлөмүш Океев келип турчу. Ал учурда каалаган адам эшикти такылдатып кирип келчү", — деди Сыдыкбеков.
Ошол жылдары Темиркул Үмөталиев китеп сүйүүчүлөр коомунун башкармасынын төрагасы эле. Гапар Айтиев Кыргыз ССРинин сүрөтчүлөр союзун жетектесе, Түгөлбай Сыдыкбеков жаңы чыгармаларды жаратуу менен алектенген.
Тема боюнча:
Бөбөктөрдүн тилин таап тасма тарткан Видугирис. Таберик сүрөт
Залкарлардын башын бириктирген "Каныбек". Таберик сүрөт
Жаңылыктар түрмөгү
0