Залкарлардын башын бириктирген "Каныбек". Таберик сүрөт
Жазылуу
Sputnik Кыргызстан маалымат агенттиги архивде сакталган сейрек сүрөттөрдү жарыялап, анын тарыхын баяндоону улантат.
© Sputnik / Александр Федоров
СССРдин эл артисти Сүймөнкул Чокморов (Жолой) менен белгилүү актер Аман Камчыбековдун (Каныбек) сүрөтү 1977-жылы Чүй облусунда тартылган.
Ал жылы кинорежиссер Геннадий Базаров жазуучу Касымалы Жантөшевдин романынын негизинде "Каныбек" тасмасын тартууга киришкен. Кинокартинанын сценарийин Базаров менен Кадыркул Өмүркулов жазып, Калый Молдобасанов композиторлук кылган.
Ошол кезеңди тасманын оператору Мурат Жыргалбаев мындайча эскерет:
"Мен ал фильмде профессор Геннадий Базаровдун устаканасынан өткөм, андан көп нерсе үйрөнүп, кийин башка тасмаларга катышууга мүмкүнчүлүк түзүлгөн. "Каныбек" фильми Сабира Күмүшалиева, Алиман Жангорозова, Бакен Кыдыкеева, Насыр Кытаев, Турсун Уралиев, Асанкул Куттубаев, Советбек Жумадылов, Сүймөнкул Чокморов, Аман Камчыбеков, Чоро Думанаев, Мария Кутманалиева, Жекшенаалы Арсыгулов, Дүйшөн Байдөбөтов өңдүү таланттуу актерлордун башын бириктирген. Ал фильмди тартууда оператор катары массовка менен иштешүүдө кыйынчылыктар болгон. Базаров бери жакта туруп алып бардыгына көз салып, кичине эле жери туура эмес болуп калса байкап массовкадагыларды үйрөтчү", — деди Жыргалбаев.
Жаштайынын байлардын колунда кул болуп жашоосун өткөргөн Каныбектин жашоо-турмушу, малайлыкты чагылдырган кинофильмдин басымдуу бөлүгү Чоң-Кемин, Алай жана Кочкор райондорунда тартылган. Кинокартинада акыйкатсыздыктан тажаган башкы каарман өзүнүн, кедейлердин таламын талашып жеңилет, башынан көп азап-тозокту өткөрөт. Соңунда жалгыз дарак токой болбой тургандыгына көзү жетет.
Тема боюнча:
