Сырдыбаев: магистранттарга Алтай, Томск ЖОЖдоруна бюджеттик орун берилет
Жазылуу
Жусуп Баласагын атындагы КУУнун тарых жана чөлкөм таануу факультетинин деканы, тарых илимдеринин кандидаты, доцент Турат Сырдыбаев аталган факультетте магистратура дагы профилдерге бөлүнүп окутуларын айтты.
Факультет учурда бакалавр бүтүрүүчүлөрү үчүн конкурс жарыялады. Ага катышуу үчүн Улуттук университеттин социалдык тармактагы баракчаларына кирип, шилтеме аркылуу каттоодон өтсө болот. Бул тууралуу Турат Сырдыбаев Sputnik Кыргызстан радиосуна маек куруп жатып билдирди.
Сырдыбаев: магистранттарга Алтай, Томск ЖОЖдоруна бюджеттик орун берилет
Анын айтымында, аталган конкурска тарых багытында магистратурага тапшырууну каалаган, республикадагы ЖОЖдордун гуманитардык факультеттеринин бакалаврын бүтүргөн бардык каалоочулар катыша алат.
"Биздин университет магистратура багытында да профилдерге бөлүп окутат. Быйылтан тарта архив кызматкери, музей кызматкери жана түркология боюнча жаңы багыттар ачылууда. Быйыл магистратурага тапшырууну каалагандар үчүн өзгөчө мүмкүнчүлүк бар. Анткени биз Россиянын Алтай мамлекеттик университети жана Томск мамлекеттик университети менен биргеликте конкурс өткөрүүдөбүз. Өлкөнүн бардык ЖОЖдорунун гуманитардык багытында бакалаврды аяктаган бүтүрүүчүлөрдүн бардыгы катыша алат. Конкурстун шарты боюнча социалдык тармактардагы Улуттук университеттин расмий баракчаларына кирип, шилтеме аркылуу катталышы керек. Андан соң россиялык коллегаларыбыз онлайн форматта, биз офлайн негизде интервьюга чакырабыз. Бет келишип, сүйлөшүү этабынан кийин конкурстан өткөн магистранттар Алтай жана Томск университеттерине же биздин окуу жайга тарых же чөлкөм таануу багытында бюджеттик орунга магистратурага тапшыра алышат", — деди Сырдыбаев.
Ал аталган конкурс Кыргыз улуттук университетинин 90 жылдык мааракесинин алкагында жүргүзүлүп жатканын кошумчалады.
