Кыргыз телекөрсөтүүсүнүн легендасы... Бактыбек Мамытовго жазылган некролог
21:11 20.05.2022 (Жаңыртылды: 21:17 20.05.2022)
© Фото / предоставлено Бактыбеком Мамытовым
Жазылуу
Мамытов өлкө алдындагы өзгөчө эмгеги үчүн Даңк медалы менен сыйланып, ага Кыргыз Республикасынын эмгек сиңирген артисти, 2018-жылы Кыргыз Республикасынын эл артисти наамдары ыйгарылган.
БИШКЕК, 20-май — Sputnik. Президенттин администрациясы белгилүү диктор, КР эл артисти Бактыбек Мамытовдун көз жумганына байланыштуу некролог жарыялады.
Эскерте кетсек, Бактыбек Мамытов 20-майда 72 жаш курагында көз жумган.
Айтылуу алып баруучу 1975-жылдын мартында Кыргыз ССРинин Телерадиокомитетине диктор болуп жумушка алынган. Дээрлик 40 жылдан ашуун аталган мекемеде эмгек өтөгөн.
"Бактыбек Мамытов диктор катары балдарга, жаштарга, улууларга арналган көрсөтүүлөрдү, жаңылыктарды, саясий-коомдук берүүлөрдү, айыл чарба, укуктук, тармактык көрсөтүүлөрдү алып барды. Өзгөчө "Кыргызстан" саясий-аналитикалык көрсөтүүсү, "Арноо концерти" сыяктуу берүүлөр элдин эсинде. Мамлекеттик деңгээлдеги расмий иш-чараларды, майрамдык ири салтанаттарды бийик чеберчиликте алып барган. Анын кайталангыс үнү, мукам тембри, алып баруу манерасы көрүүчү, угуучуну арбап алар эле. Ар бир кыргыз үй-бүлөсүнүн бир мүчөсү катары Бактыбек Мамытов эл сыймыгы, эл адамына айланды", — деп айтылат некрологдо.
Мамытов өлкө алдындагы өзгөчө эмгеги үчүн Даңк медалы менен сыйланып, ага Кыргыз Республикасынын эмгек сиңирген артисти, 2018-жылы Кыргыз Республикасынын эл артисти наамдары ыйгарылган.
Бийлик кыргыз телеберүүсүнө чоң салымын кошкон Бактыбек Мамытовдун элеси жүрөктө сакталарын айтып, маркумдун туугандарына жана жакындарына терең кайгыруу менен көңүл айткан.
