Багышбекова: ден соолукту калыбына келтирүү — айыгуунун маанилүү этабы
© Sputnik / Асель Сыдыкова
Жазылуу
Медициналык кайра калыбына келтирүү борборунун башчысы, жогорку категориядагы врач, терапевт, Саламаттык сактоонун отличниги Күлмира Багышбекова өлкөдө ден соолукту реабилитациялоого көңүл бурулбай келерин айтты.
Ден соолукту дарылануудан кийин кайра калыбына келтирүү этабы абдан маанилүү. Бирок бул багытты мамлекет колго албай келет. Мындай пикирин Күлмира Багышбекова Sputnik Кыргызстан радиосунда маек куруп жатып билдирди.
Багышбекова: ден соолукту калыбына келтирүү — айыгуунун маанилүү этабы
Анын айтымында, реабилитациялоо боюнча адистер өлкөдө жетишсиз.
"Адам операция болгон соң же жаракат алса, болбосо ооруп айыккандан кийин ден соолукту калыбына келтирүү этабынан өтөт. Бул организм үчүн абдан маанилүү, аны дарылануудан бөлүп кароо зарыл. Учурда, тилекке каршы, бул багытта мамлекет тарабынан олуттуу иштер жасалбай жатат. Коомчулук өзү деле кайдыгер мамиле кылат. Бир аз өзүн жакшы сезип калганда кадимки жашоо ыргагына кирип кетишет, жыйынтыгында толук айыкпай, ал тургай өнөкөт ооруга айланып кетиши мүмкүн. Кайра калыбына келтирүүчү процедураларды сунуштасак көп учурда баш тартып коюшат. Анан калса бул жаатта адистер да жетишпейт, мамлекеттик медициналык мекемелерде керектүү жабдуулар эскирген. Экинчиден, ден соолукту калыбына келтирүү түйшүктүү болот. Убакытты, туура тамактануу менен так режимди талап кылат. Көпчүлүк бейтаптарга бул жакпайт. Чет элден дарыланып, ал жактан мындай процедуралардан өтүп келген гана адамдардын айрымдары кайра калыбына келтирүүчү медициналык борборлорду өздөрү издеп келишет", — деди Багышбекова.
Ал ошондой эле ден соолукту калыбына келтирүүдө саламаттыкты чыңдоого багытталган курорт, санаторийлер менен биргеликте иш жүрсө туура болорун кошумчалады.
