Алмазбек уулу: телефонду каттоо казынага 5 млрд. сом киреше алып келет
© Sputnik / Асель Сыдыкова
Жазылуу
Маалыматтык коопсуздук жана IT инфраструктурасын өнүктүрүү ассоциациясынын жетекчиси Нурфаиз Алмазбек уулу учурда колдонуп жүргөн телефондордун IMEI коду автоматтык түрдө катталарын белгиледи.
IMEI-коддорду каттоо мобилдик телефондордун аткезчилигине бөгөт коюёт. Бул тууралуу Нурфаиз Алмазбек уулу Sputnik Кыргызстан радиосунда маек куруп жатып билдирди.
Алмазбек уулу: телефонду каттоо казынага 5 млрд. сом киреше алып келет
Анын айтымында, мындан улам бюджетке кошумча 5 миллиард сом түшөт.
"Бардык мобилдик аппаратта 15 сандан турган IMEI коду бар. Бул кайсы бир гана телефонго таандык болгон персоналдык код болуп эсептелет. Ал телефондун оригиналдуу экенинен, жасалма эместигинен кабар берет. Башкача айтканда, бул код — мобилдик телефон таандык болгон фирманын сапаттуу товары экендигинин кепилдиги. Учурда өлкөгө аткезчилик менен сапатсыз мобилдик аппараттар көп келүүдө. Токтомго ылайык, идентификациядан өтпөгөн телефондор өлкө ичинде иштебейт. Демек, бул аталган товардын аткезчилигине бөгөт коёт. Мындан тышкары, жарандар сапатсыз телефондорду сатып албай калат. Ал эми өлкө казынасына кошумча 5 миллиард сомдой каражат түшөт. Бул Кыргызстандын пенсиялык фондуна тете каражат. Телефондун IMEI кодун каттатуу ар бирине 700 сомдон каралууда, бирок муну импортчулар жүргүзөт. Карапайым элдин чөнтөгүнө эч кандай таасир деле тигизбейт. Себеби биздин импортчулар мобилдик аппараттарды түз фирмадан эмес, ортомчулардан алышат. Ошондуктан анын баасы жогорулап калат. Мунун ордуна фирмадан түз оригинал телефон алышса, аны каттатуу менен акыркы алуучуга азыркы эле баада жеткиликтүү болуп калат", — деди Алмазбек уулу.
Ошондой эле ал уурдатып же жоготуп жиберген мобилдик телефонду автоматтык түрдө өчүрүп коюу менен уурулукту дагы токтотууга мүмкүн болорун кошумчалады.
