Кубанычбеков: январда бажы кызматкерлери аттестациядан өтөт
12:52 24.12.2021 (Жаңыртылды: 15:51 24.12.2021)
© Sputnik / Асель Сыдыкова
Жазылуу
Финансы министрлигине караштуу Мамлекеттик бажы кызматынын төрагасы Адилет Кубанычбеков аталган тармактан түшкөн кирешени эки эсеге көтөрсө боло турганын белгиледи.
Бюджетке бажы тармагынан түшкөн каражатты жылына 100 миллиард сомго жеткирүүгө мүмкүндүк бар. Бул тууралуу Адилет Кубанычбеков Sputnik Кыргызстан радиосунда маек куруп жатып билдирди.
Кубанычбеков: январда бажы кызматкерлери аттестациядан өтөт
Анын айтымында, бул үчүн аталган тармактагы санариптештирүү ишин жөнгө салуу зарыл.
"Финансы министрлиги тарабынан Мамлекеттик бажы кызматына 48,5 миллиард сом план коюлган. Учурда аны аткаруу үчүн аракеттер көрүлүүдө. Кийинки жылга 98,5 жарым миллиард сом план белгиленди. Бул дээрлик эки эсеге көп. Учурунда бажыдан түшкөн каражат 30 миллиард сом кезинде Кубанычбек Кулматов 50 миллиард сомго чыгаруу максатын айткан. Ошондо да ишенбегендер болгон, бирок бул ишке ашты. Азыр 50 миллиард сомду топтоо жеңил эле болуп калды. Азыркы тапта 100 миллиард сом каражат топтолот дегенге ишенбестик болууда. Бирок буга жетүү үчүн тийиштүү механизмдер жана потенциал бар. Кызматка келген 1,5 айдын ичинде бул тармактын мүмкүнчүлүктөрүн анализдеп көрдүм. Министрлер кабинетинин төрагасы тажрыйбалуу экономист экенин унутпашыбыз керек. Ошондуктан ал киши койгон пландар реалдуу. Буюрса эмдиги жылы алдыга койгон амбициялуу пландарды аткаруу канчалык мүмкүн экенин убакыт көрсөтөт. Ал үчүн көмүскө экономика, аткезчилик менен күрөшүп, санариптештирүү, автоматташтырууну жөнгө салуубуз кажет. Мындан тышкары, кадрлардын потенциалын көтөрүү зарыл. Муну ишке ашыруу максатында январда бажы кызматкерлери аттестациядан өтөт. Билимдүү, патриот кызматкерлерди жумушка чакырабыз", — деди Кубанычбеков.
Ошондой эле ал айрым нормативдик маселелерди жөнгө салуу зарыл экенин кошумчалады.
Подкасттын толук вариантын видеодон көрүңүз:
