БИШКЕК, 25-авг. — Sputnik. Талас шаардык кеңешинин КСДП фракциясынын экс-депутаты алдамчылыкка шектелип кармалды. Бул туурасында УКМКнын маалымат кызматынан кабарлашты.
Шектүү ыкчам-издөө иш-чаралардын жүрүшүндөгү "Алдамчылык" беренеси боюнча Кылмыш жана жоруктардын бирдиктүү реестрине катталган сотко чейинки өндүрүштүн алкагында колго түшүрүлгөн.
"Ж.С. аттуу экс-депутаттын 2017-жылы алдамчылык жол менен чет элдик инвесторлордон жети миллион сомдон ашык суммадагы материалдык мүлк жана каражатты тартып алганы аныкталган. Жыйынтыгында ал ИИМ тарабынан издөөдө жүргөн", — деп айтылган таратылган маалыматта.
Бишкек шаарынын Биринчи май райондук соту экс-депутаттын 2021-жылдын 18-октябрына чейин УКМКнын тергөө камак жайында баш коргоо чарасын караганы белгилүү болду.
