БИШКЕК, 14-авг.— Sputnik. "Токтогул" суу сактагычындагы суунун көлөмү ушул күндөрү 12 миллиард куб метрге жетип калды. Бул тууралуу "Электр станциялары" компаниясынын маалыматында айтылган.
14-августка карата ГЭСтеги суунун көлөмү 11 миллиард 931 миллион куб метрди түзөт. Секундасына 448 куб метр агып кирсе, кайра 396 куб метри иштетилип жатат.
Майдын соңунда Токтогул ГЭСиндеги суунун көлөмү 10 миллиард куб метрден өйдө болгон. Ага чейин бир айдын тегерегинде өтө төмөн түшүп, 8,6 миллиардды көрсөтүп калган. Адистер менен бийлик муну суунун аз келип жатканы менен байланыштырган.
Эске сала кетсек, суу сактагычта эң көп дегенде 19,5 миллиард куб метр, ал эми өтө азайып кеткенде 5,5 миллиард суу болушу керек. Токтогул ГЭСи Кыргызстандагы эң ири гидроэлектростанция. Ал өлкөдөгү жалпы электр кубатынын 30 пайызын иштеп чыгат жана ал негизги энергетикалык таяныч. ГЭС 46 жылдан бери иштеп келе жатат.
