БИШКЕК, 2-авг. — Sputnik. Ош шаардык кеңешине шайланган депутаттар мандат алып, кызматка расмий түрдө киришти.
Депутаттык күбөлүктү Борбордук шайлоо комиссиясынын мүчөсү Узарбек Жылкыбаев жана Ош аймактык шайлоо комиссиясынын төрагасы Урмат Аттокуров тапшырды.
Иш-чарага калаа мэринин милдетин аткаруучу болуп барган Алмаз Мамбетов жана экс-мэр Таалайбек Сарыбашев дагы катышты.
Ош шаардык кеңешине 45 мандат каралган, бул орундарга жетүү үчүн 11-июлдагы кайра шайлоодо сегиз партия ат салышты. Натыйжада төрт партия жети пайыздык босогодон ашып жеңүүчү аталды.
Ага ылайык, "Ата-Журт Кыргызстан" партиясына - 19, "Биздин Кыргызстанга" - 15, "Улуттар Биримдигине" - 7 жана "Бир Болго" 4 мандат тийди.
Депутаттар саат 14:00дө алгачкы жыйынын өткөрүп, төраганы шайлоо күтүлүүдө.
