Турдубекова: баласын таштап миграцияга чыгып жаткандар каттоодон өтүшү зарыл
09:52 01.06.2021 (Жаңыртылды: 13:28 20.12.2021)
© Sputnik / Асель Сыдыкова
Жазылуу
"Балдардын укугун коргоочулардын лигасы" коомдук фондунун директору Назгүл Турдубекова "Балдар жөнүндө кодекстин" жаңы редакциясы ишке кирсе 700дөн ашык социалдык кызматкер пайда боло турганын маалымдады.
"Балдар жөнүндө кодекстин" жаңы редакциясында чет өлкөгө иштегени кетип жаткандардын балдары каттоодон өтүп, алар убактылуу жашай турган үй-бүлө менен социалдык кызматкер таанышып чыгышы талап кылынат. Эгерде социалдык кызматкер кандайдыр бир шарт менен ал үй-бүлөнү жаратпай койсо, баланы алып кала турган башка адамдарды кароого туура келет. Бул тууралуу Назгүл Турдубекова Sputnik Кыргызстан радиосуна маек куруп жатып билдирди.
Турдубекова: баласын таштап миграцияга чыгып жаткандар каттоодон өтүшү зарыл
Анын айтымында, бул балдардын укугун коргоо үчүн жасалып жаткан аракеттер.
"Кыргызстанда миграцияга кеткен ата-энелер абдан көп. Алар балдарын туугандарына, жакындарына, кошуналарына, айрым учурда атайын мекемелерге таштап коюшууда. Натыйжада алар жеткиликтүү деңгээлде каралбай калып жатат. Ошондуктан "Балдар жөнүндө кодекстин" жаңы редакциясында баласын таштап миграцияга чыгып жаткандар сөзсүз түрдө каттоодон өтүүсү каралууда. Бир дагы бала каттоосуз калтырылбай, укугу корголушу зарыл. Эгерде ата-эне баласын бирөөнүн колуна калтырып жатса, ага социалдык кызматкер баа бериши кажет. Балдар ал үй-бүлөдө калууну каалабаса же тиешелүү күнүмдүк шарттар каралбаса, социалдык кызматкер акт түзүп, өз макулдугун бербей коюуга укуктуу болот. Натыйжада ата-эне башка бүлө табууга милдеттендирилет. Мындай кадамдар алардын жоопкерчилигин күчөтүп, жашы жете электерге көрсөтүлгөн зомбулуктарды кыскартат деп ишенебиз", — деди Турдубекова.
Баласын узак мөөнөткө калтырууга мажбур болгон ата-эне убактылуу кам көргөн тарапка ишеним кат жазып берип же "багып алган" деген статус ыйгарылышы зарыл болорун кошумчалады.
