"Психолог менен баарлашуу" рубрикасына күйөөсүнүн бекер жаткандыгынан тажап, анын айынан үйдө уруш көбөйгөнүн айткан келин кат жазган.
Саламатсыздарбы! Ушул рубрикадан үй-бүлөлүк суроолор менен психологго кайрылгандарды окуп, мен да сиздерге өзүмдүн арыз-муңумду айтып кайрылууну чечтим. Биздин үйдөгү маселебиз жолдошума жана акча-тыйынга тийиштүү. Ортодо эки кызыбыз бар. Үйлөнгөнүбүзгө он жылдан ашып калды. Өзүм Таластын кызымын, бирок бишкектик жигитке турмушка чыккам. Жалгыз бала, кайындарымдын шаардын ортосунда үч бөлмөлүү үйү бар. Ата-энеси менен чогуу турабыз. Жолдошумдун кесиби программист. Аябай сабаттуу, билимдүү жигит, бирок эч жерде иштебейт. Башында ашып кетсе жарым жыл иштеп эле "менин деңгээлимдеги жумуш эмес экен" деп чыгып кетчү же айлыгы жакпайт. Ата-энеси жумуш таап беришет, ал жакта деле жарытып иштебейт.
"Үйү бар, кайнатаңдар иштейт, сага эмне жетишпейт?" — деген туугандар да болот. Бирок күйөөңдүн айынан көз каранды болуп жашаган эң жаман экен. Жедеп ата-энеси уулун аяп, оозу-мурдуна тыга берип ак кол болуп калган деп ойлойм. Бирок кайненем күйөөсүнө көрсөтпөй баласына акча катып берип, болбой эле бапестеп турат. Жолдошум достору менен кээде мончого же бильярдга барып эс алат. Андайда мен да акча бербейм, кайнатамдан сурай албайт. Бирок энесинин акчасы менен барат.
Жолдошум экөөбүз да акыркы убакта көп урушчу болдук. Өмүр бою түйшүк тартамбы? Муну кантип жумушка көндүрөм. Кээде батирге чыгып кетсек, кыйналганда иштеп баштайбы деп ойлоп коём. Бирок өзүм да ага батына албай турам. Ушинтип ар кайсыны ойлоно берчү болдум. Кантип тарбиялоого болот? Деги эле мүмкүнбү?
Муратбек Султанбеков, "Психоанализ.кг" психотерапия борборунун жетекчиси:
—Бул келиндин катын окусак өтө деле чоң көйгөй жок. Мында убактылуу кризис камтылган. Илгертен эле бизде эркек кишинин милдети үй-бүлөсүн камсыздоо. Айрым өлкөлөрдө аял менен эркектин акча табуусун бирдей карашып, экөө тең укукта экени белгиленсе, кээ бир мамлекеттерде акча табуучу катары эркекти гана карайт. Ошондой эле ар бир үй-бүлөнүн өз ара мамилеси, түшүнүгү, келишими болот. Бул жубайлар деле он жыл мурда бири-биринин кайсы бир тарабын, мүнөзүн жактырып үйлөнүшкөн да. Баш кошордо жаштар бири-бирине көп учурда убада беришет. Бирок кээде алар турмуш-шартка, менталитетке жараша аткарылбай калат. Бул үй-бүлөнү алып карасак, келиндин күйөөсүндө акча табууга мотивация жок өңдүү. Муктаждык болуп калса апасы акча берип коёт экен. Иштебей калсам, эртең ачка калбайбызбы деген коркунуч жок. Каттын ээси да жолдошун акча табуу жөндөмү жокпу деп түйшөлүүдө.
Негизинен эркекти үй-бүлө башчысы катары ага ишеним көрсөтүп, колдогон оң. Антпесе, ал өзүн таштап, баалабай калат. Мунун аркасы менен ал эч нерсе менен иши жок, жанын багып эле жүрө бергенге өтөт. Каттын ээси да жолдошу менен сүйлөшүп, өзүнүн күнөөсүн да анализдеп көргөнү туура. Ошондой эле ата-энелер да балдарынын жүгүн ашыкча мойнуна илип албаганга аракет кылганы дурус.
