23 жаштагы бразилиялык мото спортчу Матеус Барбоза Сан-Паулу аймагындагы "Интерлагос" трассасындагы жарышта жол четиндеги тосмого урунуп каза болду. Бул тууралуу Eurosport маалымат булагы жазды.
Кырсык 8-ноябрда болгон. Kawasaki командасынын намысын коргоп жаткан спортчу мотоциклин башкара албай калып, жолдон чыгып кеткен. Катуу ылдамдыкта келе жаткандыктан, күү менен барып темир тосмого урунган. Медициналык тез жардам көрсөтүлгөнү менен анын өмүрүн сактап калууга мүмкүн болгон эмес.
Мексикалык реслер оюн учурунда жүрөгү кармап мерт болду. Видео
Каргаша марага дагы 10 айлампа калып, Матеус төртүнчү катарда келе жаткан учурда болгон. Кырсыктын себеби азыркыга чейин аныктала элек. Жарыш ошол замат токтотулган. Уюштуруучулардын расмий билдирүүсүндө жарыш бардык коопсуздук чаралар менен камсыздалганын айтышкан. SuperbikeBrazil уюму көз жумган спортчунун үй-бүлөсүнө материалдык колдоо көрсөтүүгө убада берди.
Бул окуя "Интерлагос" трассасында адам өлүмү катталган биринчи учур эмес. 2019-жылы бул жайда катарынан эки мото спортчу Маурисио Палудете жана Данилу Берту каза болгон. Ал окуядан соң уюштуруучулар бурулуштардагы кооптуу жерлерди азайтышып, трибунанын бир бөлүгүн алып салышкан. Деген менен бул аракет кезектеги кайгылуу окуядан качууга жардам бере алган жок.
