БИШКЕК, 15-окт. — Sputnik. Азыркы тапта Кыргызстандагы абалды турукташтырууга багытталган бардык кадамдар маанилүү. Бул тууралуу Россия президентинин маалымат катчысы Дмитрий Песков маалымат жыйын учурунда айтканын РИА Новости жазды.
Билдирмеге ылайык, Песков КР президенти Сооронбай Жээнбековдун отставкага кетиши боюнча да өз оюн билдирген.
"Кандайдыр бир эмоционалдык критерийлерге таянып баа берүүгө мүмкүн эмес. Азыр Кыргызстандагы абалды турукташтырууга багытталган бардык кадамдар маанилүү", — деди Песков.
Ал Москва Кыргызстанда болуп жаткан окуяларга тыкыр көз салып турарын айтып, КРде кырдаал тез аранын ичинде турукташып, тынчып, мыйзам талаасына келишине тилектеш экенин кошумчалаган.
Россия Кыргызстанга каржылык колдоо көрсөтүүнү токтотту
Эскерте кетсек, Кыргызстандын президенти Сооронбай Жээнбеков отставкага кетип жатканын айтып, кайрылуу жасады. Мамлекет жетекчиси өлкөнүн тынчтыгы, элдин бүтүндүгү, коомдун ынтымагы кызмат ордунан бийик экенин айтып, ар бир мекендештин өмүрү баарынан кымбат деп белгиледи. Мындан улам Жапаровду жана башка саясатчыларды өз тарапкерлерин тынч жол менен таратууга чакырган.
