БИШКЕК, 10-окт. — Sputnik. Кечээ, 9-октябрда, Бишкектеги "Ала-Тоо" аянтында өткөн митингдеги кагылышууда жети адам жабыркагандыгын Саламаттык сактоо министрлигинин маалымат кызматы билдирди.
Ага ылайык, Улуттук госпиталга алты адам кайрылып, анын экөө жаткырылып, төртөөнө амбулатордук жардам көрсөтүлгөн. Ал эми Чүй облустук ооруканасына кайрылган бир жаран амбулатордук жардам алган.
Буга чейин "Форум" мекемесинин алдында чогулуп турган мурдагы президент Алмазбек Атамбаев менен "Республика" партиясынын негиздөөчүсү Өмүрбек Бабановдун тарапташтары "Ала-Тоо" аянтына келишкен.
"Ала-Тоо" аянтында эки тарап кагылыша кетти
Саясатчылар эл алдына чыгып сүйлөп жатканда эски аянттан Садыр Жапаровдун тарапташтары келген. Алгач биринчи тарап Садыр Жапаровдун колдоочуларын сүрүп чыгарууга аракет кылып, кийин эки жактан тең таш ыргытылып, ызы-чуу башталган.
