БИШКЕК, 28-июн. — Sputnik. Өкмөт мурдагы депутат Исхак Масалиевдин Facebook тармагына жазган сын-пикирине жооп катары түшүндүрмө берди.
Мындан эки күн мурда Масалиев өкмөттүн Кыргызстандагы эпидемиологиялык абалдагы кадамын сынга алган.
"Эмне кымбат, ден соолукпу же бийликпи. Өзгөчө абал режимин киргизүү боюнча Боронов зарылдык жок дейт. Ооруну жуктургандар тездик менен көбөйүүдө. Бул илдеттен эми эл өлө баштады. Эмнеге чектөө киргизилбей жатат? Менимче, эки себеби бар...", — деп андан кийин өзүнүн пикирин жазган.
Өкмөт берген жообунда "чындыгында учурда өлкөдөгү эпидемиологиялык абал кыйын болуп турганын, бирок жарандардын аң-сезимдүүлүк деңгээлин жогорулатууга басым жасалып жаткандыгын" айткан.
"Азыркы тапта жарандардын аң-сезимдүүлүк деңгээлин жогорулатууга басым жасалууда. Мындан тышкары Бишкек шаарында эс алуу күндөрү коомдук автоунаалардын жана такси кызматынын кыймылы убактылуу токтотулду", — деп айтылган маалыматта.
Боронов: 118 кызматындагыларды көбөйтөбүз, Тез жардамга дагы 20 бригада келет
Ооруган жарандардын санынын көбөйүшүнө жол бербөө максатында мамлекеттик мекемелердин кызматкерлеринин басымдуу бөлүгү аралыктан иштөө режимине которулганын белгилешкен. Шаардык мэрияларга, облустук жана райондук мамлекеттик администрацияларга базарларда, соода борборлорунда, эл көп топтолгон жерлерде санитардык эрежелердин сакталышына көзөмөлдү күчөтүү тапшырылганын кошумчалашкан.
"Аны менен катар медицина кызматкерлери белгилешкендей, 2020-жылдын март айынын башында Кыргызстандын айрым аймактарында өзгөчө абал режимин киргизүү туура чечим болгон. Бул коронавирус инфекциясынын жайылышын азайтууга шарт түзгөн", — деп айтылган маалыматта.
Өкмөт өзгөчө абал режими алынган соң көпчүлүк кыргызстандыктар медицина кызматкерлери сунуштаган чараларды сактоого кайдыгер мамиле жасап жатканын айткан. Андан сырткары элди саламаттыгы үчүн жоопкерчиликтүү болууга чакырган.
