БИШКЕК, 25-июн. — Sputnik. Балыкчы — Каракол автоунаа жолунун 104-184,5 чакырымын реконструкциялоо үчүн Араб өлкөлөрүнөн насыя алынат. Кредиттик келишимди ратификациялоо боюнча мыйзам долбоору парламентте каралды.
Тагыраак айтканда, Корумдудан Балбай Баатыр айылына чейинки 80,5 чакырым жолду оңдоо пландалууда.
Бул долбоорду ишке ашыруу үчүн төмөнкү донорлордон 115,9 миллион доллар кредит алуу макулдашылган.
- Сауд өнүктүрүү фонду — 35 миллион доллар;
- Араб экономикалык өнүктүрүү Кувейт фонду — 28,9 миллион доллар;
- Абу-Даби өнүктүрүү фонду — 22,00 миллион доллар;
- ОПЕК — 10 миллион доллар;
- Ислам өнүктүрүү банкы — 20 миллион доллар.
Салына турган автоунаа жолу долбоор боюнча төрт тилке менен жүрүүгө ылайыкталган эл аралык маанидеги жол болушу шарт. Тротуарлар, аялдамалар, суу куурлары, арык лотоктору, жарык берүүчү лампаларды коюу, көпүрөлөрдү кеӊейтүү жана велосипед жолун салуу каралган.
