БИШКЕК, 17-июн. — Sputnik. Социалдык тармакты жана ЖМКларды көзөмөлдөй турчу "Маалыматты манипуляциялоо жөнүндө" мыйзам долбоору бүгүн парламентте биринчи окууда каралды.
Документке ылайык, маалымат жалган же тастыкталган экенин Маданият, маалымат жана туризм министрлиги аныктап, провайдерге, сайттын же анын баракчасынын ээсине соттун катышуусу жок эле чектөө жөнүндө чечим чыгара алат. Провайдер интернет колдонуучуларынын үнү менен жазылган маалымат, текст, сүрөт же башка электрондук маалыматтарын алты айга чейин сактап коёт. Зарыл болгон учурда аларды сот, ыкчам-иликтөө ишмердигин жүргүзгөн ыйгарым укуктуу органдарга берүүгө милдеттүү.
Демилгечилер — эл өкүлдөрү Гүлшат Асылбаева жана Айнура Осмонова.
Бул мыйзам долбоорго депутаттар Дастан Бекешев менен Элвира Сурабалдиева каршы чыкты.
"Бул мыйзамда интернет алууда Казакстанга көз каранды болуп калат экенбиз. Өзүңүз казак диаспорасынын өкүлү болгондуктан бул мыйзамга демилгечи болбой эле койсоңуз болмок. Коңшу өлкөнүн дагы бир жагынан басым жасашына жол бербешибиз керек. Кызыкчылыктар кагылышы бар бул жерде. Экинчиден, эң чоң жетишкендигибиз — сөз эркиндигибизди чектеп алабыз. Техникалык жактан бул мыйзамды иштетүү кыйын. Пайдасынан зыяны көп нерсени кылуунун кереги жок", — деди Сурабалдиева.
Мыйзам долбоорунун автору Асылбаева фейк маалыматты аныктоо менен сөз эркиндигин чектөө башка нерсе экенин белгиледи. Ал эми мыйзамды казак диаспорасынын өкүлү эмес, ЖК депутаты катары сунуштап жатканын айтып өттү.
