БИШКЕК, 29-май — Sputnik. Бишкекке Филиппинден жана Түштүк Кореядан 58 кыргызстандык кайтып келди. Бул тууралуу Тышкы иштер министрлигинен билдиришти.
"29-майда Сеул — Бишкек — Сеул чартердик каттамы менен 58 жаран кайтып келди. Бул каттам Кыргызстандын Түштүк Корея, Япония жана АКШдагы жарандарын мекенине жеткирүү үчүн корей тарап менен макулдашуулардан кийин ишке ашты", — деп айтылат билдирүүдө.
Бардык учуп келген мекендештер тийиштүү медициналык процедуралардан өтүү үчүн обсервацияга жаткырылды.
Чет өлкөлөрдөгү кыргыз жарандарын кайтаруу жолдорун издөө улантылууда.
