БИШКЕК, 11-май — Sputnik. Адам карантинге карабай өзүн канчалык эркин сезсе, ошончолук дистанттык түрдө натыйжалуу иштейт. Бул тууралуу Монреаль университетинин (Канада) окумуштууларынын иликтөөсүнө таянып Daily Mail басылмасы жазды.
Адистер үйдө иштөө канчалык натыйжалуу экенин билүү үчүн 1600 кишиден сурамжылаган.
"Респонденттер арасында карантиндик чектөөлөргө карабай өзүн эркин сезгендер үйдө иштегенден бери бир күндө мурдагыдан көбүрөөк тапшырма аткарганга жетишип, өзүнө-өзү ыраазы болуп жатканын айтышты", — деп жазылат макалада.
Ал эми сырт менен байланышы чектелип калганына көбүрөөк кыжырлангандар өз милдетин ойдогудай аткара албай жатканын билдиришкен.
Адистердин айтымында, бул нерсе адамдын психологиялык өзгөчөлүктөрүнөн көз каранды болушу мүмкүн. Мисалы, карантинде өзүн начар сезгендер жамаатта, көп кишинин арасында иштегенди жакшы көргөндөр.
Эске салсак, 11-март күнү Дүйнөлүк саламаттык сактоо уюму коронавирус боюнча дүйнөдө пандемия жарыялаган. Ошондон бери дүйнөнүн бир топ өлкөсүндө карантин жарыяланып, учурда миллиондогон киши дистанттык түрдө иштөөгө аргасыз болууда.
