БИШКЕК, 27-апр. — Sputnik. Казакстандын президенти Касым-Жомарт Токаев коронавирустан улам өзгөчө абалды 11-майга чейин узартты. Бул туурасында Sputnik Казакстан кабарлады.
"Эгерде эпидемия кайрадан жанданып кетпесе, мыйзам боюнча 11-майда өзгөчө абал аягына чыгат. Бул кайталанбайт деп ишенем”, — деген президент өзүнүн билдирүүсүндө.
Казакстан башка өлкөлөр сыяктуу эле коронавирустун апаатына кабылып, бир нече адам көз жумган.
Эпидемиологиялык кырдаалдан улам өлкөдө 16-марттан 1-майга чейин өзгөчө абал киргизилген.
27-апрелдеги маалыматтарга таянсак, аталган өлкөдө COVID-19 жуктурган 2 717 учур катталган. Анын ичинен 27 адам көз жумса, 682 киши айыгып кеткен.
