БИШКЕК, 19-апр. — Sputnik. Өзгөчө абал режими киргизилген Оштун Кара-Суу жана Ноокат райондорунда жазгы талаа иштери кызуу жүргүзүлүп, аягына чыгып калды. Бул туурасында аталган аймактардын акими Тилек Матраимов менен Давран Маматалиев брифинг учурунда билдиришти.
Матраимовдун айтымында, жазгы талаа иштеринин 98 пайызы соңуна чыкты.
"Жазгы талаа иштерин үзгүлтүккө учуратпоо үчүн дыйкандарга ар тараптан колдоо көрсөтүлгөн. Өз учурунда дыйкандарга керек тетик каражаттарын саткан дүкөндөр ачылып иштеп жатат. Андан сырткары, ар бир айыл өкмөт башчылары тарабынан көчмө көчөт базарлары уюштурулду", — деди ал.
Көчөт боюнча 0999 08 92 97, 0775 02 12 88, 0557 04 14 89 номерлерине чалууга болот.
"Ноокат районунда жазгы талаа иштери кызуу жүрүп жатат. Дыйкандар жер семирткич жана керектүү жабдыктар менен камсыздалган. Ошондой эле айдоо жерлерге суу жеткирүү үчүн жер-жерлерде арык жана каналдарды тазалоо иштери уюштурулду", — деп билдирди Маматалиев.
Эске салсак, Кыргызстандын төрт шаары жана төрт районуна 30-апрелге чейин өзгөчө абал режими киргизилген. Бул аймактарда кечки саат 9.00дөн эртең мененки 6.00гө чейин коменданттык саат иштейт.
