БИШКЕК, 16-апр. — Sputnik. Кремль Улуу Жеңиштин 75 жылдыгына карата 9-майда Москвада өтө турган парадды жылдыруу чечимин кабыл алды. Бул туурасында маалымат булактарына таянып, РБК жазды.
Агенттиктин билдиргенине караганда, параддын башка учурга жылганы боюнча жуманын аягында президент Владимир Путин расмий билдирүү жасайт.
"Параддын жылдырылганы Коопсуздук кеңешинин жыйынында, 16-апрелде жарыяланат", - деп айткан маалымат булагы.
Ал салтанаттуу иш-чаранын кайсы күнгө белгиленгени айтылар-айтылбасын так билдирген эмес.
Ал эми башка маалымат булагы параддын качан өтөрүн коронавирус пандемиясынан улам айтуу кыйынга турарын кабарлаган.
"Азырынча баары парадды июнда өткөрүүгө мүмкүн болот деп ишенип турушат", — деп кошумчалаган.
Ал эми жылдын башында Кыргызстандын президенти Сооронбай Жээнбеков башында турган делегациянын Жеңиш парадына барары күтүлүп жатканы айтылган. Аны курамында согуштун үч ардагери жана Кыргызстандын Куралдуу күчтөрүнүн 52 аскери бар эле.
Коронавирус дүйнөнүн башка мамлекеттери сыяктуу Россияны да каптады. Акыркы маалыматтар боюнча, бул өлкөдө COVID-19 жуктургандар 24 миңден ашса, алардын 2000и айыгып чыкты. Ал эми 198 адам көз жумду.
