БИШКЕК, 15-апр. — Sputnik. Кыргызстанда коронавирустан бир суткада жети бейтап айыгып, ооруканадан чыгарылды. Бул тууралуу брифинг учурунда саламаттык сактоо министринин орун басары Нурболот Үсөнбаев билдирди.
Анын айтымында, Ош облустар аралык клиникалык ооруканасынан эки бейтап, Бишкек шаарынан беш бейтап стационардан чыкты. Алар ооруканадан чыгарылып жатканда кайрадан жасалган анализдери вирус жок экенин көрсөткөн.
Ушуну менен жалпысынан коронавирустан 78 бейтап айыгып, үйүнө жиберилди.
Ал эми сутка ичинде Кыргызстанда дагы 19 адамдан COVID-19 аныкталды.
