Кожогелдиева: дасторкон үстүндө баарлашуу конфликттин алдын алат
Ар бир киши жеке өзгөчөлүккө ээ. Ал коомго аралашып жашоого муктаж. Азыр адамдар абдан активдүү, ар нерсе менен алектенгенге мүмкүнчүлүк бар. Ал эми бүгүнкү кырдаалда өзгөчө көп кабаттуу үйлөрдө жашагандар үчүн өтө кыйын болууда. Мындай пикирин Канышай Кожогелдиева Sputnik Кыргызстан радиосунун эфиринде маек куруп жатып билдирди.
Анын айтымында, үй-бүлө мүчөлөрү менен убакыт өткөрүү менен бирге эле ар бир адам өзү менен өзү болуп, ойлонуп, өз алдынча боло алгандай да шарт болушу керек.
"Биринчиден, адамдын жашоо-турмушу эмес, активдүүлүгү, кыймыл-аракети чектелип калды. Топтолгон энергияны кайда чыгарарын билбей, терс эмоционалдык абалга кептелип калып жатышат. Бул эми үй-бүлө мүчөлөрүнөн да көз каранды. Себеби көп убакыт бир үйдө отурганды көтөргөн, көтөрө албагандар да бар. Мен дайыма үй-бүлөдөгү ынтымак, психологиялык комфорт ошол үйдөгү ар бир мүчөдөн, айрыкча ата-энеден көз каранды деп айтып келем. Үйдө ынтымак бекем болушу үчүн тамакка баары чогуу отуруп, бири-бири жөнүндө көбүрөөк билип, дайыма баарлашып туруу керек. Мындай үй-бүлөдө ызы-чуу чыга бербейт. Менин байкашымча, учурда ким биринчи келсе тамактанып алып, кийинкиси өзүнчө тамактанып, айтор бир столго чогулган учурлар азаюуда. Азыркы абалда болбоду дегенде эки күндө бир жумуштарды бөлүшүп алып үй тазалоо керек. Жумуш үстүндө тамашаларды, кызыктуу окуяларды айтып, көңүл ача турган музыка коюп койгон оң. Биз дайыма классикалык музыка угууну сунуштап келебиз. Себеби бул жанр адамды бейпилдикке тартуучу музыка болуп эсептелет. Ошону менен катар үйдө шахмат, топ таш жана башка түрдүү оюндарды ойносо болот", – деди Кожогелдиева.
Психолог үйдө дене көнүгүүлөрүн жасоо да убакытты көңүлдүү өткөргөнгө жардам берерин кошумчалады.
