БИШКЕК, 2-апр.— Sputnik. Борбор калаада жасалма өткөрмө кагаз менен жүргөн айдоочу кармалды. Бул тууралуу Бишкек шаардык комендатурасынын маалымат кызматы кабарлады.
Билдирмеге ылайык, колго түшүрүлгөн киши 32 жашта. Анын Land Rover үлгүсүндөгү автоунаасы айып короого токтотулду.
"1-апрель күнү Айни — Чапаев көчөлөрүнүн кесилишинен инспекторлор Land Rover үлгүсүндөгү автоунаанын айдоочусун токтотушкан. Машинанын маңдайында көк түстөгү өткөрмө кагазы чапталып турган. Документти текшере келгенде ал жасалма болуп чыкты. Эске салсак, көк түстүүсүн алгандар шаар ичинде 24 саат бою жүрө алышат", — деп жазылат маалыматта.
Жерине Ленин райондук ыкчам тергөө тобу барып, автоунаа айып короого токтотулган. Чогултулган материалдар тергөө кызматына өткөрүлүп, Кылмыш жана жоруктардын бирдиктүү реестрине катталган. Бишкек шаардык комендатурасынын маалымат кызматы Кылмыш-жаза кодексинин 359-беренеси ("Документти жасалмалоо") боюнча сотко чейинки өндүрүш иштери башталганын кошумчалады.
Бишкекте өзгөчө абал учурунда ары-бери каттоо үчүн ар кайсы кызматтарда иштеген жарандарга үч түрдүү өткөрмө кагаздар берилип жатат. Көк түстүүсүн алгандар шаар ичинде 24 саат бою жүрө алышат. Кызыл түстөгүсүн алгандар саат 7.00дөн 20.00гө чейин жүрө алышат, адатта булар ар кайсы мекемелерде иштеген кызматкерлер, дүкөн, дарыканаларды товар менен камсыз кылган ишкерлердин колунда. Сары түстөгүсү медиктер менен банк кызматкерлерине берилет.
Эске салсак, Кыргызстандын Бишкек, Ош, Жалал-Абад шаарларына жана өлкөнүн үч районуна өзгөчө абал киргизилген. Ал эми калган облустарда өзгөчө кырдаал режими иштейт.
