БИШКЕК, 26-мар. — Sputnik. Казакстан менен Кытайдын чек арасында жайгашкан "Хоргос" эл аралык соода борборунун Кытай тарабындагы бөлүгү ишин жандантты. Бул тууралуу "Синьхуа" басылмасы маалымдады.
"Кытайдын Синьцзян-уйгур автономдуу районунда жайгашкан "Хоргос" эл аралык соода борбору иштей баштады",— деп жазылат билдирмеде.
Казакстандын Zona.kz интернет порталы соода борбордун казак тарабы азырынча жабык экенин айтты. Алматы облусунун администрациясынын маалымат кызматы бул боюнча билдирме берген.
Казакстан менен Кытайдын чек арасында жайгашкан "Хоргос" базары коронавирусту алдын алуу максатында январдын аягында жабылган эле.
"Хоргос" базары — Кытай менен Казакстандын чек арасында орун алган эркин соода аймагы. 528 гектарлык жерде алты соода борбору жана 2 миңдей бутик орун алган. Ага кирүү үчүн башка өлкөлөрдүн жарандарына виза алуунун зарылдыгы жок.
