БИШКЕК, 19-мар. — Sputnik. Кошунаны атайын формачан жана милициянын коштоосунда келген медиктер көрүп же алып кетсе паникага алдырып, тартып алган сүрөттөрдү социалдык тармактарга таратуунун зарылдыгы жок. Себебин саламаттык сактоо министринин орун басары Төлө Исаков түшүндүрүп берди.
Айта кетсек, учурда социалдык тармактарда жана мессенджерлерде "кошунам коронавирус жуктуруптур, Тез жардам алып кетти" деген маанидеги билдирүүлөр абдан көп. Далил катары колдонуучулар формачан медиктердин сүрөт жана видеолорун жүктөп жатышат. Мунун аркасы менен коомдо паникага алдыргандар дагы бар.
Sputnik агенттиги атайын формачан медиктер, айрым учурда милициянын коштоосунда ар кайсы үйлөргө барып жатканынын себебин окурмандарга түшүндүрүү үчүн Саламаттык сактоо министрлигине кайрылды.
Министрдин орун басарынын айтымында, атайын формачандар дал ушул үй карантининде жаткандардын абалын көрүүгө барып, кандайдыр бир белгилер болсо ооруканадан анализ алуу үчүн алып кетип жатышат.
Мындан тышкары, Кыргызстанда коронавирус жуктурган алгачкы учурлар катталган соң абал бир аз өзгөрдү.
"Мисалы, кечээ өлкө боюнча Сауд Аравиясынан вирус жуктуруп келгендер менен чогуу бир учакта болгон, аларды тосуп алган, үйүнө конокко барган, байланышта болгон адамдар изделди. Аларга дагы атайын формачан медиктер барды. Бирок ал адамдын баары оору жуктуруп алды деп айта албайбыз. Болгону шектенүүлөрдү жокко чыгаруу үчүн байкоого алып кетип жатабыз", — деди Исаков.
Анын айтымында, учурда медиктер коронавируска тиешелүү бардык текшерүүлөргө, чакырууларга атайын форма кийип барууда, бул медиктердин коопсуздугу үчүн жасалган аракеттер.
Ошондой эле эмне себептен айрым учурда Тез жардам кызматын милиционерлер коштоп жүрөрүн түшүндүрдү.
"Эл болгондон кийин арасында ар кандай адамдар болот экен. Көп эмес, бирок айрым кишилер карантинден кадимкидей качып, каршылык көрсөткөн учурлар болууда. Мындайда милициянын жамдамына муктаж болуп жатабыз", — деди орун басар.
Мындан улам министрликтин өкүлү бардык жасалып жаткан аракеттер ооруну өлкө боюнча таратып ийбөө максатында экенин айтып, элди абалды туура түшүнүү менен кабыл алууга чакырды. Ошондой эле көргөн нерсенин баарын интертетке таратып, элди дүрбөлөңгө салбоого үндөдү.
Буга чейин ИИМ коронавирус жугузуп алды деп жалган кабар тараткан бир катар адамдарды суракка алган эле.
Эске салсак, Кыргызстанда кечээ, 18-мартта, коронавирус биринчи жолу үч адамга жукканы аныкталды. Жарандардын бардыгы Жалал-Абад облусуна караштуу Сузак районунун тургундары. Алар Сауд Аравиядан кичи ажылыктан келген. Сузак районуна болсо өзгөчө кырдаал киргизилген.
Кыргызстанда учурда коронавируска байланыштуу абал кандай болуп жатканын Sputnik Кыргызстан агенттигинин тексттик трансляциясынан биле аласыздар.
