БИШКЕК, 19-мар. — Sputnik. Жогорку Кеңештин депутаты Камчыбек Жолдошбаев коронавирус менен күрөшүүгө бир миллион сом бөлүүгө даяр экенин билдирди.
Учурда парламент өлкөдөгү кырдаал боюнча өкмөттүн маалыматын угуп жатат.
"Медиктердин башына түшкөн чоң түйшүк болду. Биз бул жерде кол алышкандан коркуп жүрөбүз, алар оорулуулар менен бетме-бет көрүшүп дарылап жатат. Кыргызстанда белдүү ишкерлер бар, ушундай учурда жардам бериш керек. Мага банктык эсепти бергиле, бүгүн үй-бүлөмдүн атынан штабга бир миллион сом котором", — деди Жолдошбаев.
Буга өкмөт башчы Мухаммедкалый Абылгазиев "сиздей жарандарыбыз көп болсун" деп ыраазычылык билдирди.
Буга чейин айрым депутаттар коронавирус менен күрөшүүгө бир айлык маянасын которууну сунушташты.
