БИШКЕК, 24-дек. — Sputnik. 2018-жылы февралда Бишкек мэриясынын Жер колдонуу жана курулуш башкармалыгынын кызматкерлери жеке турак жай деген негиз менен 4 кабаттуу мейманкананы пайдаланууга уруксат берген. Бул тууралуу Башкы прокуратуранын маалымат кызматы билдирди.
Мейманканада 21 номер, 23 санузел жана чоң үч зал болгон.
Андан сырткары, бир курулуш болгонуна карабай башка-башка курулду деген документ менен жалпы аянты 533 чарчы метр болгон дүкөн дагы эксплуатацияга берилген.
Башкы прокуратурадан кабарлашкандай, курулган объектилерди муниципалдык органдар эмес, архитектура-курулушту көзөмөлдөөчү органдар кабыл алышы керектигин эскертет. Андыктан коммерциялык багыттагы имараттардын жеке турак-жай деген документтер менен эксплуатацияга алынышы мыйзамды одоно бузгандык деп айтышты.
16-декабрда Бишкек прокуратурасы аталган материалдарды Кылмыш-жаза кодексинин 320-беренесинин 2-бөлүгү ("Кызмат абалынан кыянаттык менен пайдалануу") менен Кылмыш жана жоруктардын бирдиктүү реестрине каттаган. Иш Экономикалык кылмыштуулукка каршы күрөшүү кызматына өткөрүлүп берилди.
