БИШКЕК, 13-дек. — Sputnik. Жогорку Кеңештин депутаты Исхак Масалиев төрага Дастан Жумабековду отставкага кетирүү боюнча сунушту парламентке жөнөттү. Маалыматты эл өкүлү Sputnik Кыргызстан агенттигине тастыктады.
Масалиевдин айтымында, фракция сунушту карап жатат.
Депутат Facebook баракчасына да эмне үчүн мындай сунушту киргизгенин толук жазган. Анын айтымында, жаңы жылдын алдында коом, ар бир адам баласы жаңыланууга умтулат. Масалиев учурда Жогорку Кеңешке айтылып жаткан айрым сындардын чындыгы бар экенин белгилеген.
Эл өкүлү, андан сырткары, жогорку мамлекеттик органдын имиджи жетекчиден толук көз каранды экенин жазган.
"Учурдагы төрага Дастан Артисбекович Жумабеков бул кызматка даяр эместиги айдан ачык көрүнүп турат. Ал жаш, балким, дагы үйрөнүшү керектир. Мен аны кызматтан чакыртып алуу боюнча сунушумду фракцияга жолдодум, ал талкууланып жатат. Колдоо табат деп ойлойм. Биз ушундай кадамга барышыз керек деп ишенем. Жок дегенде бир нерсе кылалы...", — деп жазган Масалиев.
Белгилей кетсек, Жогорку Кеңештин төрагасы Дастан Жумабековдун палатада сүйлөгөн сөздөрү социалдык тармактарда катуу талкууга алынып келет. Анын Казакстанга болгон иш сапары учурундагы сөздөрү, жакында эле Жогорку Кеңеште мыйзамдарга добуш берүү учурунда Германиянын Франкфурт-на-Майне шаарын туура эмес айтып алышы интернет колдонуучулары арасында сынга кабылган.
Дастан Жумабеков 2017-жылдын 25-октябрында Жогорку Кеңештин төрагасы болуп шайланган.
