ОШ, 27-ноя. – Sputnik. Кара-Суу районунда экстремизм жана терроризмге үгүттөөгө шектелип кармалган 31 жаштагы киши Ош шаардык сотунун чечими менен бир айга камакка алынды. Бул тууралуу шаардык милициянын маалымат кызматынын өкүлү Абсатар Тавакалов Sputnik Кыргызстан агенттигине билдирди.
Анын айтымында, шаардык милициянын экстремизмге жана мыйзамсыз миграцияга каршы күрөшүү кызматы тарабынан ушул жылдын 21-сентябрында ыкчам иликтөө иш-чаралары жүргүзүлгөн.
Факты ошол эле күнү шаардык милициянын нөөмөт бөлүмү тарабынан Кылмыштардын жана жоруктардын бирдиктүү реестрине Жазык кодексинин 315-беренесинин 1-бөлүгүнүн («Экстремисттик материалдарды даярдоо, таратуу») негизинде катталып, тергөө иштери башталган.
Анын жүрүшүндө шектүүнүн ким экени жана жашаган жери аныкталган. Ал Кара-Суу шаарынын 1987-жылкы А.К. аттуу тургуну болуп чыкты.
"А.К. ушул жылдын апрель айында Сириядагы "Таухид валь-Жихад" эл аралык террордук уюмунун катарына кошулган. Ал А.С. аттуу адам менен тыгыз байланышта болуп, Кыргызстан жана Өзбекстандын аймагында террордук уюмдун үгүттөө иштерине активдүү катышып жүргөн", — деди Тавакалов.
Ушул жылдын 26-ноябрында шектүү милиция кызматкерлери тарабынан алдын ала даярдалган адамдан 5 миң сом өлчөмүндө акча алып, банк аркылуу А.С. деген кишиге которуу үчүн бара жатканда колго түшүрүлгөн.
Тинтүү учурунда шектүүнүн жанынан беш миң сом жана эки уюлдук аппарат табылган. Сотко чейинки өндүрүш иши Жазык кодексинин 315-беренесинин 1-бөлүгүнөн 241-беренеге («Террордук ишке көмөктөшүү») өзгөртүлүп, Ош шаардык соту бир айга камакка алган.
А.К. учурда террордук ишмердүүлүгү үчүн соттолуп, жазасын өтөп жаткан Р.К. аттуу жарандын активдүү колдоочусу экени аныкталды. Ал Р.К. менен 2017-жылдан бери тыгыз байланышта болгон. Шектүүнүн ушул күнгө чейин Р.К.га материалдык колдоо көрсөтүп жүргөнү белгилүү болду.
21-ноябрь күнү А.К. убактылуу жашап жаткан Кара-Суу районундагы үйүнүн короосунан жерге көмүлгөн тапанча (жеке номуру өчүрүлгөн, ПМ, 9 мм), 8 даана ок, пневматикалык тапанча (ПМ, 4,5 мм), 3 даана пневматикалык ок, 18 пневматикалык газ баллону, 4 даана сим-карта, ар кандай үлгүдөгү 7 флешка табылган. ал буюмдарга соттук-баллистикалык, соттук-эксперттик, диний жана лингвистикалык экспертизалар дайындалып, тергөө амалдары жүргүзүлүп жатат.
