ОШ, 17-сент. – Sputnik. Ноокатта мал уурдоого шектелген эки милиция кызматкери колго түштү. Бул тууралуу Ош облустук прокуратурасынан кабарлашты.
Маалыматка ылайык, 2019-жылдын 15-сентябрында Ноокат районунун Көк-Жар айыл өкмөтүнүн тургундары райондук милицияга кайрылып, 11-сентябрга караган түнү аталган айыл өкмөткө караштуу эгин талаасында аркандалган 4 мал (2 уй, 2 торпок) белгисиз адамдар тарабынан уурдалганын билдиришкен.
Иликтөө иштеринин жүрүшүндө аталган кылмышка шектүү катары Көк-Жар айыл өкмөтүнүн Жийде айылынын 23 жана Кызыл-Кыя шаарынын 29 жаштагы жашоочулары кармалып, убактылуу кармоочу жайга киргизилген.
Кармалган эки жаран тең Кызыл-Кыя шаардык күзөт бөлүмүнүн милиционерлери экендиги белгилүү болду.
Учурда тергөө иштери райондун прокуратурасы тарабынан жүргүзүлүп, кармалгандардын мындан башка дагы кылмыштарга тиешеси бар же жоктугун аныктоо жүрүп жатат.
