БИШКЕК, 22-авг. — Sputnik. Facebook колдонуучуларына башка сайттардан өздөрү тууралуу маалыматтарды көрүп жана көз салууга мүмкүнчүлүк түзөт. Ишке кире турчу кызмат тууралуу социалдык тармак расмий блогунда билдирген.
Жаңы кызмат "Facebook тармагынан тышкары ишмердүүлүк" (Off-Facebook Activity) деп аталат.
"Off-Facebook Activity тиркемелердеги жана сайттардагы сиздин ишмердүүлүгүңүз тууралуу маалыматтарды жиберип турат. Кааласаңыз маалыматты аккаунттан өчүрүп койсоңуз болот", — деп айтылат компаниянын билдирүүсүндө.
Аталган функция акырындык менен ишке кире тургандыгы айтылат. Аны биринчилерден болуп Ирландия, Түштүк Корея жана Испаниянын жашоочулары колдоно алат. Бир нече айдан кийин башка мамлекеттерге тарайт.
Facebook түзүүчүлөрү мындай опцияны ишке ашыруу менен колдонуучуларга соцтармактын иштөө принциби жана ченемдери тууралуу кенен маалымат берүүнү ниет кылышканын белгилешкен.
