БИШКЕК, 20-авг. — Sputnik. Экс-депутат Өмүрбек Бабанов президенттик шайлоонун алдында Он-Адырда сүйлөгөн сөзү боюнча Улуттук коопсуздук мамлекеттик комитетине суракка чакырылды. Бул туурасында аталган комитеттин маалымат кызматы кабарлады.
Белгилей кетсек, саясатчы кечээ, 19-августта, "Кыргызстан коммерциялык банкынын" иши боюнча Финполго сурак берген.
"Буга чейин Башкы прокуратура тарабынан 2017-жылдын 28-сентябрында Ош шаарынын Амир-Тимур кичи районундагы сүйлөгөн сөзү боюнча президенттикке талапкерге карата козголгон кылмыш ишинин алкагында Өмүрбек Бабанов суракка чакырылды. Ал күбө катары өтүүдө", — деп айтылат маалыматта.
Бирок экс-депутат ушул жылдын апрель айында Бишкекке кайтып келүү ниетин билдирип, кайра кийин ал чечиминен баш тарткан.
Арадан төрт ай өткөн соң, 9-августта Бишкекке келип, тарапташтары менен жолугушкан. Ошол эле учурда УКМК Бабанов Кыргызстанга кайтып келсе, мыйзам чегинде жоопко тартыларын эскерткен болчу.
