БИШКЕК, 10-июн. — Sputnik. "Электр станциялары" ААКтын маалымат катчысы Тагжана Айдаралиева кыргызстандыктарга кайрылып, электр энергиясын үнөмдөөгө чакырды. Ал бул тууралуу өзүнүн Facebook баракчасына жазып, эксперттердин баамында Кыргызстанда дал ушул мезгилде суу тартылып баштай турганын билдирген.
"Бүгүнкү күнү Токтогул суу сактагычында 14 миллиард 305 миллион куб метр суу бар. Туура бир жыл мурда анын көлөмү 15 миллиард 890 миллион куб метр болчу. Башкача айтканда, 1 миллиард 585 миллионго аз. 10-июнга карата агып кирген суунун көлөмү секундасына 835 куб метрди түзсө, 273 куб метр суу агып чыгууда. Былтыр ушул маалда секундасына 1360 куб метр суу агып кирип, 264 кубометр суу агып чыгып турган. Жай мезгилинде Кыргызстан боюнча суткасына 20 миллион киловатт-саат пайдаланылат", — деп жазылат билдирүүдө.
Ал ошондой эле суунун агып кириши бир гана жаратылыштан, башкача айтканда, 1-октябрдан 31-мартка чейин жааган жаан-чачындан көз каранды экенин белгилеген.
Анын айтымында, мындай божомолдорго карабастан адистер электр энергиясын үнөмдүү пайдалануу оң болорун белгилешкен.
"Сарамжалдуу пайдалануу — бул чектелип калуу эмес. Болгону күнүмдүк жашоодо электр энергиясын үнөмдөөчү каражаттарды колдонуп, жылыткычтарды, электр плиталарын жана тиричилик техникасын туура тандоо зарыл. Үйлөр менен имараттарды жылуулоо дагы электр кубатынын үнөмдөлүшүн шарттайт", — деди Айдаралиева.
Буга чейин энергетиктер кыш айларында электр кубаты үзгүлтүккө учурабай турганын айтышкан.
