БИШКЕК, 8-май — Sputnik. Кыргызстанда жылына 22-25 миңдей жолбун ит атылып жок кылынат. Бул тууралуу Ветеринардык жана фитосанитардык коопсуздук боюнча мамлекеттик инспекциянын директору Калысбек Жумаканов Жогорку Кеңештин жыйынында билдирди.
Депутат Бакирдин Субанбеков учурда жолбун ит, мышыктар көбөйүп жатканын айтты.
"Жолбун иттер менен мышыктар көбөйүп кетти, эмне үчүн ошолорго чара көрбөйсүңөр? Алар ар кандай жугуштуу ооруларды алып келип жатпайбы", — деп эл өкүлү суроо салды.
"Иттердин ээлери болгону дарыгерлерге да жакшы. Каттоого алынган итти барып дарылаганга да жеңил. Ал эми көчөдөгү итке бара албай жатабыз. Жакында "Жаныбарларды коргоо жөнүндө" мыйзам долбоорун алып келебиз. Ал жерде жолбун иттерди кимдер тескей турганы жазылган", — деди ал.
Жумаканов ошондой эле азыр 411 миң ит каттоого алынганын кошумчалады.
