БИШКЕК, 29-янв. — Sputnik. Жогорку Кеңештин депутаты Алмазбек Эргешов "Аба кодексине өзгөртүү киргизүү жөнүндө" мыйзамдын арты менен кимдер каражат табарын айтып берди.
Мыйзам долбоордун демилгечилеринин айтымында, өзгөртүүлөрдүн негизинде "ачык асмандын бешинчи тепкичи" киргизилет — чет элдик учактар жүргүнчүлөрдү, жүктөрдү, багажды Кыргызстанга алып келип, кайра башка өлкөлөргө ташый алат.
Эргешов белгилегендей, мыйзамдын кабыл алынышы авиакаттамдардын баасына таасир этпейт.
"Бүгүнкү күндө Бишкектен Москвага учуу 140 долларды түзөт. Баалар төмөндөбөйт. Бирок кыргызстандыктар үчүн жакшы жери Европа менен түштүк-чыгыш Азияга түз каттамдар ачылат", — деди эл өкүлү.
Ал ошондой эле жаңы мыйзамдын арты менен транзиттик рейстерди кабыл алган аэропорттор каражат табарын, кызматтар кеңейтилгендиктен жаңы жумушчу орундар түзүлөрүн кошумчалады.
