БИШКЕК, 16-янв. — Sputnik. Филиппиндин футбол боюнча курама командасынын машыктыруучусу Йоран Эрикссон Кыргызстан менен боло турган оюн катаал боло турганын билдирди. Бул тууралуу КРдин Футбол федерациясы билдирди.
Белгилей кетсек, оюн 16-январь күнү Дубайдагы Rashid Stadium стадионунда Бишкек убактысы менен саат 19.30да башталат.
"Биздин команда үчүн татаал оюн болот. Эки курама тең плей-оффко чыгуу мүмкүнчүлүгү бар экенине терең ишенет. Атаандаштарыбыздын чабуулчулары мыкты, өзгөчө №9 номердеги оюнчуну (Эдгар Бернхард — ред.) белгилеп өткүм келет. Кыргызстандын командасы жакшы ойнойт, муну буга чейинки эки беттеште көрсөтүштү. Мүмкүнчүлүк эки командада тең бирдей, бирок плей-оффко чыгуу үчүн жеңиш жетишсиз. Башка тайпалардагы оюндардын жыйынтыгын күтүү керек", — деди Эриксон.
Ал эми улуттук команданын машыктыруучусу Александр Крестинин футболчулар оюнга даяр экенин айтты.
"Балдардын маанайы жакшы, бардык аракетибизди жумшайбыз", — деди ал.
Ушу тапта улуттук курама тайпада үчүнчү орунда турат. Дарбазага киргизген жана өз дарбазасына кирген топторунун саны боюнча бүгүнкү атаандаштардан алдыда. Эки команданын тең упайы жок.
Кыргызстан менен Филиппин командалары буга чейин жолдоштук беттеште ойногон, анда кыргызстандыктар 1:2 эсеби менен утуп алган.
