БИШКЕК, 18-дек. — Sputnik. Борбордук шайлоо комиссиясы жергиликтүү кеңештин депутаттарына төш белги тапшырууда. Бул тууралуу БШКнын маалымат кызматынан кабарлашты.
Анын ар биринин баасы 74 сомду түзүп, 10 000 даана буюртма кылынган. Жалпы өлкө казынасынан 740 миң сом сарпталды.
Эске сала кетсек, БШК ал төш белгилерди алуу үчүн 2016-жылы 6,3 миллион сомго тендер жарыялаган. Алар ошол жылдын соңунда шайланган жергиликтүү кеңештин депутаттарына тапшырылмак. Бирок ага коомчулук тарабынан нааразычылыктар жаралып, аны менен бирге тендерде эң арзан баа сунуштап утулуп калган компания укук коргоо органдарына арыз менен кайрылып, иш соңуна чыккан эмес. Андан соң 2018-жылдын август айында 3 миллион 800 миң сомго кайрадан тендер жарыяланып, аны бир төш белгини 74 сомдон жасап берчү ишкана утуп алган.
