Бурадарда 28-ноябрдагы маанилүү делген окуяларды тизмектеп, назарыңызга сунуштайбыз.
Кечээки күнү эл кулак түргөн маалыматтардын бири — киши колдуу болуп көз жумган Бурулай кыз боюнча соту экенин айтпасак деле аңдап турган чыгарсыз. Ала качып, кийин милициянын кеңсесинде кызды бычактап өлтүрдү деп шектелип жаткан жигит Марс Бөдөшев сотто окуянын чоо-жайын айтып берди. Мындан кийин окуя дагы чаташып, көп суроолор жаралган бойдон калды. Ошондо милициянын имаратынын ичинен ызырынып, сөгүнүп өтүп кеткен ким болгон? Кыз кимге күлө багып караган? "Мен аны карап калсам, Бурулай күлүп койгон. Ошол бойдон эмне болгонун билбейм, көзүмдү ачсам ооруканада жатыптырмын", — деп бүтүргөн соттогу сөзүн Бөдөшев.
Тергөө аяктамайын, сот акыркы чечимин чыгармайын кыздын кырчындай өмүрүн ким кыйгандыгын билүү эми кыйын тейде калды… Кандай болгон күндө да чырактай кыздын жанын кыйгандар жазасын тартышы керек. Ары карап кеткен кишинин жанын койгулачы дегендер четтен чыгар, бирок колу менен жасагандар күнөөсүн башы менен тартышы лаазым.
Кечкурун күндөшүнүн кофесине сымап кошуп өлтүрүүгө аракет кылды деп күнөөлөнгөн аял 9 жылга кесилгендиги боюнча маалымат келип түштү. Аны окугандан кийин бактыңды ошентип талашып эмне мураска жеттиң, сабыр кылбапсың, кап… деген ой келет.
Дагы бир тагдыр… Ошто Танзила аттуу келин жашайт экен. Москвада иштеп жүргөн күйөөсү өмүрлүк жарынын ракка кабылганын укканда кумга сиңген суудай жок болуптур… "Жолдошум ушундай оор күндөрдө жөлөп-таяп жанымда болуп, балдарыма каралашмак турсун дайынын билдирбей кетти. Мындай тагдырга туш болом деп үч уктасам түшүмө кирчү эмес", — деп көз жашын көлдөтсө, жүрөк тилинет.
Ага улай эле ЖКнын депутаты Алмамбет Шыкмаматов алиментти толук эмес, жарым-жартылай да төлөбөй качып жүргөн аталардын акесин мыйзам жолу менен таанытуу керектигин айтты. "Белгилей кетүүчү жагдай, бул жерде жоопкерчилик өз жанын араң багып жүргөн, иши же үйү жок эркектерге эмес, колунда бар, тентек, кара өзгөй эркектерге карата багытталган. Алар чет өлкөгө бир гана эс алуу, убактыларын кызыктуу өткөрүү үчүн чыгып турушат", — деди Шыкмаматов.
Жетимдин пешенесин сылап, жүзүнөн сүй. Бишкекте жакшы саамалык болуптур. №24 мектеп-гимназиянын окуучулары ата-энелери жана класс жетекчилери менен биргеликте жетим балдар үйүнө барды. Бөбөктөргө момпосуй берип, ойноп, сүйлөшүп, абалын сурап кайтышыптыр.
Бурадарды жакшы маанай менен жыйынтыктагыбыз келип турат. "Дүйнөнү сулуулук сактайт" дешет эмеспи. Береги таберик сүрөттү карасаңыз. 1984-жылы Нарында тартылыптыр. Сонун!
Баса, Кыргызстанда сасык тумоо менен грипп күчөп турат. "Сактансаң сактайм" дейт, абайлаңыз. Эгер Бишкекте болуп, аталган илдетке чалдыкпаш үчүн эмдетем десеңиз, эртерээк жасатыңыз.
Валюта наркы. Сомдун баасы долларга карата орто эсеп менен 69.78 (сатып алуу) жана 69.90 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 47.00 сом, АИ-92 үлгүсүндөгү май 44.30 сом, ал эми дизель майы 47.50 сомдон сатылууда.
Соңку сөз. Жамандыкты амандык жеңет.
Жакшы маанай каалап, Нургүл Максутова.
